Siglir tar il cuntegn

Engiadina Ovra electrica Samedan duai daventar ina societad d'aczias

La vischnanca da Samedan vul midar si'ovra electrica en ina societad d'aczias. Il concern d'energia grischun Repower vul cumprar 49% da las aczias. la suprastanza communala e la Repower han infurmà en vista a la votaziuns dals 8 da december.

Legende: Video Impraisa electrica Samedan duess daventar in SA abspielen. Laufzeit 2:07 Minuten.
Or da RTR dals 16.11.2016.

L'interess per la sairada d'infurmaziun n'è betg stà fitg grond. Radund 50 persunas han tadlà las explicaziuns. Il president communal ha motivà la proposta da la suprastanza communala per in nov futur da l'Ovra electrica Samedan.

Memia pitschen

L'Ovra electrica Samedan saja memia pitschna per funcziunar vinavant da maniera autonoma sco gestiun da la vischnanca ha argumentà il president communal da Samedan, Jon Fadri Huder. Quai tant finanzialmain sco era en vista a la segirtad dal provediment cun electricitad a Samedan. La collavuraziun cun in concern d'energia porschia percunter segirtad dal provediment e la vischnanca possia uschia era profitar finanzialmain da la vendita da las aczias.

2,4 milliuns per la vischnanca

Repower vul pajar 2,4 milliuns francs per ils 49% da las aczias da l'Ovra electrica da Samedan. En pli surpiglia Repower era ils quatter collavuraturs actuals da l'Ovra electrica cun garanzia che las pajas restian quellas dad hoz. Repower garantescha era che las taxas per la forza electrica restian sin il nivel dad oz, quai enfin l'onn 2020. Finanzialmain interessant per la vischnanca è era il fatg che la nova societad d'aczias surpiglia era ils debits da l'Ovra electrica da 2,6 milliuns francs. La vischnanca avess uschia la mesadad da quest import, 1,3 milliuns francs damain debits.

Rapreschentants da RePower e capo da Samedan
Legenda: Il president communal da Samedan Jon Fadri Huder ed ils rapreschentants da Repower durant la saira d'infurmaziun. RTR, David Spinnler

Pertge vender ina fatschenta che renda?

Dumondas criticas hai surtut dà en vista al fatg che l'Ovra electrica Samedan fetschia actualmain adina buns gudogns. La vischnanca survegnia mintg'onn radund 500'000 francs dal gudogn. Pertge lura vender ina tala fatschenta? Quai ha dumandà l'abitant Guido Lazzarini. Ils experts da Repower han dentant taxà pli bas ils gudogns da l'Ovra electrica Samedan, sin be radund 270'000 francs. E la vischnanca ha mussà via sin il fatg che la vischnanca survegniss in gudogn garanti da radund 140'000 francs durant ils prims trais onns da la nova societad d'aczias. Il CEO da Repower Kurt Bobst ha en pli declerà che ses concern saja interessà da porscher servetschs en las regiuns grischunas per mategnair plazzas da lavur. In pitschen gudogn saja pussaivel en connex cun il provediment cun forza electrica, ma quai na saja betg la motivaziun principala per l'engaschament da Repower tar ovras sco quella da Samedan. Crititgà è era vegnì il pretsch da vendita da 2,4 milliuns francs per ils 49% da las aczias. Quai saja in pretsch fitg bas.

Decisiun ils 8 da december

La radunanza communala da Samedan decida ils 8 da december davart la midada da l'Ovra electrica en ina societad d'aczias e davart la vendita da 49% da las aczias a la Repower. Sche la vischnanca di gea duai la nova societad d'aczias esser operativa il prim da fanadur 2017.

RR actualitad 08:00