Las Ouvras Electricas d’Engiadina han gì in bun onn da gestiun 2020/21. La producziun d’electricitad è stada sur la media da blers onns. Contribuì a quest svilup positiv han tranter auter l’enviern cun blera naiv e la stad bletscha. Sco las ovras scrivan, hajan ellas producì 1,4 milliardas uras kilowatt. Quai bastass per cuvrir trais quarts dal basegn da forza electrica da l’entir chantun Grischun. Ed era ils custs da producziun sajan sa sviluppads bain. Cun 3,83 raps per ura kilowatt èn quels stads uschè bass sco anc mai en l’istorgia da l’interpresa engiadinaisa.
Investiziuns da 26 milliuns francs
Durant l'ultim onn han las ovras electricas investì tranter auter en ils implants idraulics existents u er en la sanaziun dal tunnel tras il Munt La Schera. Ina part da las investiziun è er ida en l'ovra idraulica sur cunfin sut la fracziun da Martina. Quest project è calculà cun totalmain passa 600 milliuns euros.
20,7 milliuns francs tschains d'aua
Sper taxas e taglias da passa 26 milliuns francs han las ovras er pajà 20,7 milliuns francs tschains d'aua (l'onn avant eran quai 21 milliuns francs). Profità dals tschains d'aua han las vischnancas concessiunarias S-chanf, Zernez, Scuol, Valsot ed il chantun.
