Michael Roth, il directur da las Ovras electricas d’Engiadina banduna la fatschenta, sco l'interpresa ha communitgà. Suenter 8 onns a la testa da quella saja el sa decis per ina nova sfida. Da nov fa l'um da 46 onns, oriund da Solothurn, part da la direcziun da la Repower, nua ch'el cumenza il pli tard la proxima stad. El surpiglia la sparta da fatschenta «producziun e rait». Tgi che succeda a Michael Roth a la testa da da las Ovras electricas d’Engiadina n’è anc betg enconuschent.
Cumplettà la direcziun cun in ulteriur commember
Sper Michael Roth daventa era Dario Castagnoli nov commember da la direcziun tar la Repower. El lavura actualmain en la direcziun da l'interpresa internaziunala Nexus Energia nua ch'el è responsabel per il management, il commerci e las energias regenerablas. Tar la Repower vegn l'um da 46 onns ch'è ordiund da l'Italia a surpigliar la sparta «commerci ed informatica».
Michael Roth ha 18 onns experientscha en la branscha d'energia, Dario Castagnoli 20 onns. Omadus cumenzan lur plazzas novas il pli tard il fanadur 2022. Cun els consista la direcziun da la Repower da nov or da tschintg empè da quatter persunas. Fin uss devi anc la plazza dal responsabel per las prestaziuns sut Samuel Bontadelli che ha bandunà la Repower l'october 2021. Sias funcziuns èn vegnidas repartidas cun la nova strucura sin las plazzas che Daro Castagnoli e Michael Roth surpiglian da nov.
