Las Ovras electricas Engiadina investeschan en tut 26 milliuns francs per la revisiun da las turbinas d'aua e dals transfurmaturs en l'ovra Pradella. Il project ha cumenzà il 2022 e va anc fin il 2024.
Dapi l'entschatta 2023 vegn la terza da quatter gruppas da maschinas revedida. Cunquai po la perdita d'efficacitad vegnir reducida per 3%. Quai munta tar ina producziun da 1'000 GWh ad onn in auzament da 30 GWh. Plinavant vegnan era ils dus transfurmaturs da l'onn 1967 remplazzads. L'emprim è puspè en funcziun, l'auter vegn remplazzà il 2024. Ils novs transfurmaturs dovran ad onn 3 GWh pli pauca energia ch'ils vegls. En pli han ils novs transfurmaturs in interruptur da stgalim, vul dir che quels restan pli ditg colliads cun la rait, en cas che la rait europeica avess memia pauca tensiun. Quai auza la segirtad da provediment en la rait da auta tensiun.
En tut stattan a disposiziun 33 GWh dapli energia, quai correspunda al consum annual da radund 8'000 chasadas.
