Gia l'october passà ha ina persuna nunenconuschenta scalinà tar Roswitha Laurent a Ramosch. Igl era ina dunna che vuleva vegnir per insatge ch'ella aveva postà sur Facebook Marketplace. Pajà aveva ella gia. In mais pli tard sa repeta l'istorgia – in um giuven vul ir per ina camera.
Jau stun mal per el, perquai ch'el aveva gia pajà tut oravant.
En tut sa repetan uschè istorgias quatter giadas. Roswitha Laurent dat dapi blers onns a fit abitaziuns da vacanzas. E questa adressa è adina vegnida inditgada sco lieu per surdada.
Annunzià a polizia e Facebook
Ina da las persunas para engianadas, Benjamin Kästli da Lucerna, ha – cura ch'il cas è sa mussà – inditgà l'engion tar Facebook. Roswitha Laurent ha contactà la polizia. Quella haja fatg in rapport. Quant gronda che la schanza per las persunas donnegiadas è ch'i survegnan puspè lur daners, saja difficil da dir.
Las davosas emnas èsi dentant vegnì pli quiet a Ramosch. Bain pussibel che la vendidra ubain il vendider ch'ha fatg l'engion dovra uss ina nova adressa.