Per 2,7 milliuns francs è la Chamanna Cluozza amez il Parc Naziunal Svizzer vegnida renovada ed ha survegnì ina nova tur abitabla per il persunal. Enfin uss han las impiegadas ed ils impiegads numnadamain vivì en la chamona principala, amez ils giasts. Il credo da las lavurs da construcziun è la persistenza. Uschia è vegnì lavurà cun material indigen, la serenera funcziuna senza forza – cun in cumpost da verms ed ina serenaziun vegetala, ed er ils giasts vegnan a sentir il focus da la persistenza. Numnadamain sa basa il menu en avegnir sin products regiunals e fatgs en chasa. Tenor Ruedi Haller, il directur dal Parc Naziunal Svizzer na vai er en avegnir betg senza helicopter. Cun in sortiment adattà e novas ideas possian els però reducir ils sgols.
La Chamanna Cluozza è 111 onns veglia ed è l’unica chamona en il Parc Naziunal Svizzer nua ch’ins dastga durmir. Cun passa 4’000 pernottaziuns per stad è ella ina da las chamonas frequentadas il pli bain en nossas muntognas.