Il Parc Naziunal Svizzer è segir ina da las regiuns las pli bain protegidas en noss pajais, sche na sin il mund. Gnanca cleger ina flur u bandunar la senda è lubì. Per il mument datti dentant in'excepziun. La Chamanna Cluozza vegn renovada e sper ella vegn fabritgada ina tur per il persunal.
Facelifting per la Chamanna Cluozza
La Chamanna Cluozza è l'unica chamona en il Parc Naziunal Svizzer nua ch'ins dastga durmir e cun passa 4'000 pernottaziuns per stad è ella ina da las pli bain frequentadas chamonas en nossas muntognas. La chamona ch'è vegnida fabritgada il 1910 ed adina puspè engrondida survegn in facelifting da passa dus milliuns francs.
Sco avant passa 100 onns è l'accessibladad ina sfida. Naginas vias, be ina senda e sin quella dovr'ins trais uras per arrivar en chamona. Pli baud cun mils, oz cun il helicopter, ina sfida logistica. Tut sto esser liger e tuttina stabil per resister a las forzas da la natira. Ed ils lavurers e las lavureras na dastgan betg ir a chasa suenter lavur fatga. Els passentan emnas entiras entasum la Val Cluozza, ina da las pli selvadias vals insumma, lontan dals confamigliars e senza colliaziun da telefonin. E tuttina als blers plascha quai. Plirs èn gia la 10avla emna là a lavur.