Siglir tar il cuntegn

Header

cuntegn

Parc Naziunal Svizzer Haller da Zernez surdat a Haller dad Ardez

Cumparegliaziun dal maletgs

Stuschar reglader a sanester Stuschar reglader a dretg
Legenda:L'emprim d'october surdà Heinrich Haller da Zernez ses post sco directur dal Parc Naziunal Svizzer a Ruedi Haller dad ArdezRTR

La surdada dal post sco directur dal Parc Naziunal Svizzer da Heinrich Haller da Zernez a Ruedi Haller dad Ardez stat avant porta.

Suenter 23 onns en uffizi va Heinrich Haller en pensiun. E durant quels 23 onns ha el ramassà ina massa regurdanzas.

La regurdanza pli speziala

Heinrich Haller ha pudì passentar divers eveniments spezials en sia carriera.

  • Engrondiment dal Parc cun il plateau ed ils lais da Macun da l'onn 2000
  • Avertura dal center d’infurmaziun a Zernez da l'onn 2008
  • Gronda festa da giubileum da 100 onns l'onn 2014
  • Reconuschientscha dal reservat UNESCO Biosfera Engiadina Val Müstair

Mo spezialmain en memoria resta al directur partent il return da l’urs en il Grischun l'onn 2005. Uschè in spectacul medial suenter questa novitad n’haja mai pli dà.

Video
Il Parc Naziunal Svizzer – in sguard enavos cun Heinrich Haller
Or da Telesguard dals 25.09.2019.
abspielen

Schanza manchentada

Betg uschè gugent sa regorda Heinrich Haller vid la decisiun da la populaziun da refusar il project d’engrondir la surfatscha dal Parc Naziunal Svizzer. Quel avess gì previs ina surfatscha bunamain trais giadas uschè gronda che l'actuala.

Tenor il directur ina schanza manchentada. Er ils dus projects disditgs dal Parc Adula ed il Parc Locarnese stattan anc sin il stumi a Heinrich Haller. Pensiers e sfidas che vegnan a pertutgar en l'avegnir ses successur, Ruedi Haller dad Ardez.

Sfidas enconuschentas

L’entschatta d’october surprenda Ruedi Haller il post sco directur dal PNS. E cun quai ch'el è part dal Parc dapi 23 onns al sun las sfidas da l’avegnir enconuschentas. Per el è il pli impurtant che la natira en il Parc sa sviluppa er en avegnir senza influenza da l’uman. Vinavant saja actualmain ina gronda sfida da vegnir a dapli meds finanzials.

Adina dapli precipitaziuns chaschunan gronds donns da sendas e punts. E quai ha la consequenza che las lavurs ed ils custs creschan. Per mantegnair las lavurs, il center d’infurmaziun e tut las autras offertas turisticas avess il PNS da basegn in augment dal budget d’in mez milliun francs. Agid spetga Ruedi Haller da la regiun, dal chantun e da la federaziun.

Il Parc Naziunal Svizzer n’è betg avant il collaps finanzial – ma per pudair satisfar las aspectativas da la populaziun duvrain nus dapli meds finanzials.
Autur: Ruedi Hallerdirectur Parc Naziunal Svizzer

A Heinrich Haller da Zernez e Ruedi Haller dad Ardez restan uss anc in per dis da discussiunar sur da sfidas, lezias e midadas. Il prim d’october surprenda Ruedi Haller alura l’uffizi sco nov directur.

Video
Il Parc Naziunal Svizzer – in sguard en il futur cun Ruedi Haller
Or da Telesguard dals 25.09.2019.
abspielen

RR novitads, 18:00