Siglir tar il cuntegn

Header

vista en il Parc naziunal Svizzer
Legenda: mad, Hans Lozza
cuntegn

Parc naziunal Svizzer Popularitad resta gronda

Damain visitaders en il Parc Naziunal Svizzer e marcantamain dapli visitaders en la chasa dal Parc Naziunal a Zernez. Quai resorta dal rapport annual 2019.

En total han 90'489 persunas visità l'onn passà il Parc Naziunal Svizzer PNS. Quai èn 2% ( 2'000) pli pauc che l'onn avant. Sco quai ch'igl è da leger en il rapport annual 2019 na sajan las duas cifras dentant betg exnum cumparegliablas.

Nov sistem da dumbraziun

Per l'emprima giada hajan ins evaluà il dumber da visitaders sin fundament d'in nov model da calibraziun. Latiers è vegnì resguardà sche la medema persuna ha traversà pliras giadas il medem lieu da dumbraziun u sch'ella è ida sin la medema senda da viandar sper pliras staziuns da dumbraziun vi. Il medem mument hajan ins er introducì novas cifras zuppadas ch'erueschan il dumber approximativ da visitaders sin sendas che possedan nagin sistem da dumbraziun.

Auter vesan ora las cifras en il center da visitaders a Zernez. Là èn las entradas s'augmentadas per 33% sin 19'672. Ils motivs per quest augment marcant sajan d'ina vart las exposiziuns spezialas «Expediziun 2 grads» e «Il luf è qua». Er la buna maschaida da bel'aura e trid'aura hajan giugà ina rolla, scriva il parc.

Anc mai uschè chaud

Il clima n'era betg mo tema en l'exposiziun en il center da visitaders mabain era en la natira. La staziun da clima Buffalora, al cunfin cun il Parc Naziunal Svizzer, ha inditgà temperaturas ch'eran en media per 0,7 grads sur la media da 30 onns. La fin da zercladur hai schizunt dà in nov record cun 28,1 grads. Anc mai dapi il 1976 (il cumenzament da las mesiraziuns) èsi stà uschè chaud.

Er finanzialmain è l'onn 2019 stà in success cun entradas totalas da 7,1 milliuns francs. Il gudogn munta a 717'000 francs. Il 2018 ha il Parc Naziunal Svizzer anc regsitrà ina perdita da 360'000 francs.

Per tadlar curt e concis:

RTR novitads 17:00

Artitgels legids il pli savens

Scrollar a sanestra Scrollar a dretga