Parlament dat glisch verda per project «San Murezzan 2030»

La vischnanca da San Murezzan vul elavurar a partir da l'onn che vegn en tgenina direcziun ch'il lieu duess sa sviluppar ils proxims onns a reguard la planisaziun. Involvida duai er esser la populaziun tar la definiziun dal project.

Vista sin San Murezzan Bild in Lightbox öffnen.

Legenda da maletgs: Keystone

La suprastanza communala da San Murezzan ha perquai decis en sia davosa sesida d'approvar il plan d'acziun cun differentas activitads, scriva la vischnanca.

Grondas sfidas spetgan

Sco il president communal Sigi Asprion argumentescha haja San Murezzan da vegnir maister ils proxims onns cun pliras sfidas. Tar quellas tutgian tant il midament climatic sco er quel demografic. Da menziunar en quest connex sajan er las cifras da pernottaziun pauc constantas ed ils letgs fraids.

Ura e temp

A partir dal 2019 vegn San Murezzan a tractar la revisiun da la planisaziun locala. Cun il project «San Murezzan 2030» possia la populaziun gidar a definir co las differentas parts da la vischnanca sco, San Murezzan Bogn, cumin, Suvretta u er Champfèr duain sa sviluppar en l'avegnir quai tant en favur da giasts ed indigens.

Involver la populaziun

Da grond'impurtanza è tenor Sigi Asprion ch'ins involvia oravant tut ils abitants da San Murezzan en las discussiuns davart il purtret futur da la vischnanca. Uschia duai la populaziun, inclus ils scolars, pudair s’exprimer e far propostas durant trais occurrenzas publicas ed er sa participar a lavuratoris.

Sustegn da profis

La gruppa directiva che consista da trais commembers da la suprastanza e tschintg dal parlament da San Murezzan, vegn accumpagnada dal biro da cussegliaziun bernais IC Infraconsult.

Il punct da partenza uffizial dal project «San Murezzan 2030» vegn ad esser ils 13 da favrer 2018 en la chasa da scola Grevas a San Murezzan.

RR novitads 12:00