Sin la via dal pass dal Bernina, tranter Puntraschigna e Diavolezza, èn trais persunas mortas la sonda suentermezdi. Duas motos sajan stadas involvidas, ha la Polizia chantunala ditg sin dumonda dad RTR. Co l'accident è capità saja anc nuncler – la polizia tschertga perditgas da l'accident ch'è capità curt suenter las 3.
Durant las lavurs da salvament e rumida ha la via stuì vegnir serrada cumplettamain durant tschintg uras. E damai che l'accident è capità gist dasper in surpassadi da viafier, è er il traffic da la Viafier retica sur il Bernina stà interrut per quatter uras.
En acziun èn stads ils pumpiers da Samedan Puntraschigna, il salvament Engiadin'Ota, la Rega, la polizia da vischnanca da San Murezzan-Puntraschigna, il Care-Team Grischun, l'Uffizi federal da duana, dus managers d'urgenza da la viafier Retica ed in team dal Centro Sanitario Valposchiavo.