Plaun plaunet arriva la primavaira er en Engiadina. La prada daventa verda, flurs flureschan. Tgi che va però ad aut è svelt ina giada amez l’enviern. Numnadamain sa chatta la via sur il Pass dal Bernina per part anc adina tranter mirs da naiv da passa trais meters. Tuttina saja il privel da lavinas actualmain fitg pitschen, di Sergio Oswald, il manader dal servetsch da lavinas dal district 3. Las temperaturas chaudas dals ultims dis han procurà che la naiv è luada dapi Pasca per passa in meter.
Blera naiv, ma betg extraordinari
I saja stà in bun enviern tge che pertutga las massas da naiv. La pli gronda sfida saja stada la situaziun dal vent e las grondas differenzas da temperaturas entaifer curt temp. Uschia haja dà passa 30 lavinas sin il Pass dal Bernina. Capità n’è però nagut, quai che saja il pli impurtant. Ussa sa legra Sergio Oswald e ses team che la primavaira arriva finalmain era sin ils auts e che lur lavur survegn puspè dapli variaziun. Era sch’igl è pir avrigl – e la garanzia che l’enviern svanescha n’è betg dada.
Era sin l'Alvra vegn rumì – u tuttina fatg pista?
Blera naiv hai er anc sin il Pass da l'Alvra, nua ch'i para da vegnir fatg pista. Ils ratracs n'èn dentant betg vi da preparar pistas en in nov territori da skis mabain fan era part da las lavurs da rumida. Uschia che la colliaziun directa tranter la Val d'Alvra e l'Engiadin'Ota po bainbaud vegnir averta.
