Creschì si en ina famiglia polisportiva, ha Jon Andri Guler chattà l’onn passà, cun 19 onns, sia gronda passiun per il passlung – ed ha decis da metter tut sin la charta passlung. Gia durant si’emprima stagiun da cursas è el sa qualifitgà per pliras cursas internaziunalas da la FIS.
Resultats motiveschan
Ils buns resultats al han persvas da far vinavant passlung professiunalmain, e da vulair empruvar da cuntanscher las selecziuns per in cader da Swiss-Ski. Entant ch'auters atlets da sia vegliadetgna profitan gia d’in status da cader e survegnan uschia vestgadira e material, han umens da service e treneschan tenor in plan dals trenaders – ha Jon Andri Guler d’organisar e finanziar tut sez.
Forza mentala
Grond sustegn survegnia el da ses geniturs. E suenter la matura è el sa decidì d’absolver in praticum sco bostger avant sco da far in studi. Uschia gudognia el almain in per raps per gidar a finanziar il sport. La cumbinaziun da sport e questa lavur è però ina gronda sfida. Numnadamain ha el lungs ed intensivs dis da lavur, er corporalmain – ed ha la saira anc d’ir a trenar. Jon Andri Guler è però mentalmain ferm ed è persvas da sia via individuala.
Cun il chau arriv'ins da far tut. Sch’ins ha la motivaziun ed il vulair, lura è tut pussaivel.
Aspectativas mudestas
Entant ch’el saja motivà ed engaschà sco actualmain, vul el ir vinavant sia via. La finamira na saja il mument betg da daventar campiun olimpic, el veglia simplamain guardar quant vinavant ch’el arrivia cun sia gronda passiun.
