Experts e cussegliaders da la scola da purs dal Plantahof admoneschan dentant da memia grond'euforia. Il privel da schelentadas saja tenor els, en ina regiun sco l’Engiadin’Ota, simplamain memia grond. Che quai saja er il motiv ch’ils babuns n'hajan betg cultivà tartuffels sin grondas surfatschas.
Pir dapi 200 onns en Grischun
La bulba da tartuffel, oriunda dal Peru ed il Chile, è pir enconuschenta en noss chantun dapi ils onns enturn il temp da la gronda fomina il 1817. En regiuns autas sco l’Engiadin’Ota na datti fin uss betg novas da gronds ers da tartuffels.
Mirveglias sch’i funcziuna tuttina
Las duas famiglias da pur Ratti e Gabriel hajan simplamain empruvà ord bunder e passiun e gì cletg che la stad è stada fitg bella e chauda. Ord ils tartuffels semnads saja resultada ina racolta ch'è var 5 giadas uschè auta.
Numnadamain han ils purs pudì emplenir satgs cun en tut in pais da 3,5 tonnas.
Pretsch pli aut
La vendita dals tartuffels haja entant gia cumenzà, ha declerà il pur da Madulain Ruet Ratti. Era sch’il pretsch per kilo na saja mai cumparegliabel cun quel ord producziuns da massa hajan els gia plirs interessents sco la scola media a Zuoz u er singulas gastronomias. Sut il stritg pajan quels per in kilo tartuffels indigens bunamain il dubel, vul dir tranter 1.80 e 2.00 francs.
Cuntinuaziun dal project
Sche la buna emprima racolta è simplamain il resultat dad optimalas cundiziuns meteorologicas questa stad u sch’il clima è sa midà en Engiadin’Ota vulan ils purs examinar sez. Quai cun repeter lur acziun ed implantar l'onn proxim anc dapli tartuffels.
RR actualitad / TR Telesguard 17:40