Igl è stà il 1979 cura che Paul Grimm ha chattà la via en l'Engiadina Bassa. El ha survegnì ina plazza sco scolast en l'Institut Otalpin a Ftan. Là ha el lavurà fin tar sia pensiun il 2011. Oz abitescha el a Ftan-Pitschen, nua ch'el ha baghegià chasa.
L'istorgia e geografia sco gronda passiun
Paul Grimm ha studegià istorgia e geografia. Fin oz è quai la gronda passiun dad el. Uschia ha el scrit in cudesch davart il passà dal vitg Ftan. In cudesch cun var 400 paginas. Il Grischun e spezialmain l'Engiadina Bassa hajan adina fascinà el.
En il decurs dals ultims decennis ha il Turitgais er emprendì Vallader. Malgrà ch'i na saja betg stà simpel. En l'institut era l'entira scola numnadamain adina per tudestg. Grazia al contact cun la glieud dal vitg haja dentant funcziunà cun il temp, di el cun in lev surrir.
Gea gea, in zic Rumantsch hai jau emprendì ils ultims decennis.
Ftan è daventà il da chasa da Paul Grimm. E sco el di na vulessia el er betg pli ir davent. Cun sia dunna, ch'è medemamain dad Embrach, giauda el la pensiun.