Capità è quai tut avant quatter onns, il 2016 durant la sanaziun dal mir da fermada «Punt dal Gall». Ina firma externa ha gì l'incumbensa d'allontanar la colur che protegia cunter ruina al fund dal mir vid la svidera. Quai è stada in'incumbensa delicata. La colur dals onns 1960 ha numnadamain gì en PCB, ina chemicalia d'industria che po chaschunar cancer ed è oz scumandada sin l'entir mund.
Sin quest plazzal hai dà sbagls, scriva la procura publica en ses mandat penal dals 20 da settember 2019 ch'il schurnal regiunal da SRF ha survegnì sin dumonda.
Plazzal cun rusnas
Perquai ch'il plazzal na saja betg stà isolà a moda correcta è «ina quantitad nunenconuschenta da pulvra cun PCB» vegnida giuadora ed è uschia vegnida da tschufragnar il Spöl.
La culpa saja il survegliader da construcziun da la firma. El avess stuì controllar sch'il plazzal saja segirà avunda e cun quai isolà cumplettamain encunter dadora. Quai n'haja el betg fatg, ord «malprecauziun e cunter l'obligaziun», quai che saja stà negligientscha. La procura publica chastia perquai il survegliader cun 2'000 francs sco era cun in chasti cundiziunà da 50 taxas per di a 200 francs. Cunter la decisiun po anc vegnir fatg recurs.
15 milliuns francs per la sanaziun
Il Spöl che cula er tras il Parc naziunal svizzer, è oz contaminà cun PCB e quai sin plirs kilometers. Gia avant l'incident èn particlas tissientadas vegnidas en il Spöl, quai han examinaziuns mussà. Pestgar è scumandà e per il chantun è cler ch'il tissi sto or dal flum. La sanaziun custa radund 15 milliuns francs. Cura che quella po vegnir fatga e tgi che paja quella, è tenor il chantun e las Ouvras Electricas d'Engiadina anc avert.
Per tadlar curt e concis: