Siglir tar il cuntegn

Engiadina Pendicularas dumondan relasch da taxas da midada da maun

La Diavolezza Lagalb SA e la Engiadina San Murezzan Mountains SA han inoltrà tar quatter vischnancas la dumonda da betg stuair pajar las taxas communalas, suenter il barat da las duas regiuns da skis.

Purtret da la pendiculara Diavolezza Lagalb
Legenda: Las pendicularas da la Diavolezza Lagalb SA e da la Engiadina San Murezzan SA na vulan betg pajar taxa da midada da maun. RTR, Federico Belotti

Il cussegl communal da Puntraschigna refusescha la dumonda dals 29 da mars 2017, da desister da las taxas communalas. Quai ord motivs da pregiudizi, scriva la vischnanca en sia davosa communicaziun. Inoltrà la dumonda da relaschar las taxas da midada da maun han las duas societads er a las vischnancas da San Murezzan, Schlarigna e Samedan.

Autras opziuns

San Murezzan n’haja anc betg decis en chaussa, ha ditg il chanzlist Ulrich Rechsteiner ad RTR. Probablamain tracta la suprastanza la dumonda da las pendicularas en sia proxima sesida. Pendenta è la dumonda er anc a Samedan ed a Schlarigna. Sco che Puntraschigna scriva vinavant, vulan las quatter vischnancas dentant chattar in’autra soluziun.

Nagin ha fatg in gudogn

Il president da la Diavolezza Lagalb SA,Franco Tramèr ha declerà ad RTR che la societad haja fatg la dumonda ord dus motivs. Dad ina vart na sa tracta il barat da las duas regiuns da skis betg d’in affar nua ch'insatgi ha fatg in grond gudogn. L’acziun saja numnadamain simplamain da valitar sco acziun da salvament per la Lagalb. Da l’autra vart èn las vischnancas sez acziunarias da la societad e pretendan da quella taxas.

Franco Tramèr sa referescha er sin la lescha chantunala, la quala na prescrivia en quest cas betg che las vischnancas ston incassar las taxas, ellas pon dentant.

En tut sa tracti da taxas da midada da maun da radund 150’000 francs.

RR novitads 12:00