Las pendicularas Scuol SA han gì da cumbatter cun cundiziuns difficilas durant la stagiun 2016/2017. Dad ina vart han mancà ils giasts dal club Robinson a Vulpera che ha serrà las portas. Els han mancà sin pista ma er en ils restaurants sin la muntogna. En in da quels restaurants aveva il club fittà localitads.
Naiv e giasts, che han mancà
Da l'autra vart ha dentant era mancà la naiv, surtut al cumenzament da la stagiun d'enviern la fin dal 2016. Uschia hai dà in retgav da radund 12 milliuns francs. Quai è radund 12% sut la media dals ultims 5 onns.
Il president dal cussegl d'administraziun Andri Lansel ha ditg als 357 acziunaris preschents a la radunanza generala si Motta Naluns, che quest resultat na cuntentia betg. Las pendicularas Scuol stoppian cuntanscher in cash-flow da radund 4 milliuns francs empè da sco ussa radund 3 milliuns francs.
Sfidas per il nov directur
Impurtant è stà il bainvegni per il nov directur da las pendicularas, Andri Poo. El cumenza ses nov uffizi il prim da december. Andri Poo da Sent è inschegner da fabrica diplomà, guida da muntogna e magister da skis patentà.
Poo ha ditg envers Radiotelevisiun Svizra Rumantscha RTR, che sias finamiras per cumenzar sajan da s'occupar da la strategia da pretschs e bigliets, ma er l'infrastructura d'ennavar haja ina gronda prioritad.
Sfidas per la regiun anc pli grondas
En ses discurs ha il president dal cussegl d'administraziun, Andri Lansel, dentant intunà, che la pli gronda sfida saja, che la regiun Engiadina Bassa stoppia puspè generar dapli pernottaziuns. Uschia veglia quai bunas cundiziuns per far hotels novs, che correspundan al trend. En pli spera el, ch'ils hotels, ch'èn sanads al mument, «renaschan puspè suenter ina sanaziun».
RR novitads 20:00