La mesemna saira è stada l'emprima badigliada da la nova scola da muntogna Avrona a Tarasp. La scola Avrona è spezialisada sin uffants e giuvenils cun in cumportament social che dat en egl, uffants ch'han difficultads da motivaziun e dovran in'accumpagnament stretg. Tenor la co-manadra da la scola e responsabla per la pedagogia Susanne Lüscher daventian las gruppas d'abitar pli flexiblas.
La scola che dat suttetg a radund 20 uffants e giuvenils vul realisar per 15 milliuns francs novs edifizis che vegnan a furmar en l'avegnir il center da l'entir areal en la glischur. Per Avrona è quai in «ultim toc dal puzzle» en il rom da pliras sanaziuns dals ultims onns. L'entira renovaziun vegn realisada en trais etappas e saja lura a fin la stad 2028.
«La Bergschule Avrona sa chatta sin 1450 m autezza en ina glischur al ur dal Parc Naziunal Svizzer», quai che tuna sin la pagina d'internet da la Scola Avrona fitg idillic, è er en realitad fitg idillic. La scola cun internat è en il vair senn dal pled dapersai, en ina bella glischur sur Vulpera e Tarasp, en in areal circumdà be da guaud e muntognas. A pe dovr'ins ina bun'ura si da Scuol fin ad Avrona, cun l'auto var 15 minutas.
La scola Avrona planisescha da crear da nov l'areal da la scola cun in nov project en la valur da 15 milliuns francs. Quai è vegnì annunzià l'emna passada da l'instituziun. La nova construcziun fa part da l'istorgia da 70 onns da la scola da tradiziun. La directura da scola Sibylle Ovenstone descriva il project sco in grond pass e sa legra dals progress.
Per nus è questa construcziun in grondischem pass. Nus ans legrain enorm
Il project prevesa la substituziun dals edifizis existents «Chasa Stauffacher» e «Chasa principala» che èn actualmain colliads in cun l'auter. La nova construcziun vegn a consister da trais edifizis colliads in cun l'auter. L'emprima construcziun, che duai cumenzar la primavaira che vegn, remplazza la «Chasa Stauffacher» e cuntegna er locals da terapia e d'economia. Ils novs locals porschan chombras singulas modernas perquai che las accomodaziuns actualas per uffants e giuvenils na correspundan betg pli als standards actuals.
Supplementarmain vegn la chasa principala da l'onn 1900 sanada. Là vegnia a dar locals d'administraziun e da persunal. La cuschina che vegn utilisada actualmain resta en funcziun durant las lavurs da construcziun, fin che la nova cuschina en la nova construcziun è terminada.
L'entir project vegn finanzià cun 15 milliuns francs dal chantun Grischun, dentant sut la cundiziun che la scola Avrona funcziuna per ils proxims 33 onns sco scola speziala cun internat. La scola ha gudagnà stabilitad ils ultims onns, malgrà sfidas sco ina mancanza da scolars en il passà. La collavuraziun cun il chantun ha contribuì decisivamain a la segirezza da l'instituziun.
A la scola da muntogna Avrona lavuran actualmain var 50 persunas e porscha circa 30 plazzas da lavur cumplainas. L'avrigl cumenzan las lavurs da spazzada da la «Chasa Stauffacher» per far plaz per locals moderns e per cumplettar il maletg general da la scola.