Siglir tar il cuntegn

Engiadina Per l’emprima giada in CSI en Engiadina

San Murezzan po beneventar quest avust ils megliers chavaltgants dal siglir obstachels. Il comité d'organisaziun enturn la Samedrina Leta Joos organisescha in CSI da 4 stailas.

Chavagl siglia sur obstachel
Legenda: A San Murezzan vegnan ad esser preschents ils megliers chavaltgants dal mund Reuters

Sper Turitg, Basilea, Son Gagl e Genevra è San Murezzan cunquai il 5avel lieu, nua che l’occurrenza en il sport d’elita da chavals ha lieu quest onn.

Gruppa d’investiders porta l’eveniment

Leta Joos da Samedan è la presidenta dal comité d’organisaziun. Dapi 2 onns lavuran els vi da l’occurrenza che custa 4,5 milliuns francs. Il permiss e la finanziaziun èn segirads. Ina gruppa d’investiders indigens paja l’emprima ediziun da l’occurrenza, suenter duain ils custs vegnir cuverts cumplettamain da sponsurs.

Il CSI da 4 stailas ha lieu dals 27 enfin ils 29 d'avust a San Murezzan. La finamira è da realisar l’onn che vegn in'occurrenza da 5 stailas, la pli auta categoria.