Siglir tar il cuntegn

Header

cuntegn

Pervi da dretgs d'autur Christian Jott Jenny sto sa giustifitgar avant dretgira a Turitg

Il president communal da San Murezzan, Christian Jott Jenny, sto sa giustifitgar avant ina dretgira districtuala en il chantun Turitg. I va per chanzuns, che l’entertainer ha preschentà avant trais onns durant 22 producziuns a Turitg.

La procura publica renfatscha a Christian Jott Jenny d’avair midà texts da chanzuns e quai senza dumandar ils artavels da l’autur. I va per las uschenumnadas «Trittligass-Balladen» da Werner Wollenberger, ch’è gia mort il 1982. Jenny era sco iniziant cun ses «Amt für Ideen» producent responsabel da l'entira producziun.

Tar las midadas vi dals texts che la procura publica renfatscha al president communal da San Murezzan, sa tracti tranter auter da modernisaziuns da las chanzuns veglias. Per exempel tractan las chanzuns en la versiun da Jott Jenny da problems cun la colliaziun da WLAN. Lura cumparan er persunas sco Justin Bieber, il princi William u la duchessa Kate. Ultra da quai quintian tenor la procura publica er passaschas stritgadas sco midada dal text.

Procura publica pretenda chasti da passa 30'000 francs

Tenor il procuratur public haja Christian Jott Jenny vivì da quel temp principalmain da sia lavur culturala e perquai era profità da las midadas da text. Sco chasti pretenda il procuratur public 90 dis à mintgamai 370 francs, pia 33'300 francs, però cundiziunà cun in temp da prova da dus onns.

Nagin temp da prova duai dar per la multa pretendida da la procura publica. Quella duai muntar ad 8'300 francs. Christian Jott Jenny sez n'ha betg vulì dar pled e fatg en chaussa avant il process. I vala la presumziun d’innocenza.

Ord l'archiv

audio
Jenny: l'artist che fa politica
08:56 min, Magazin da cultura dals 30.03.2019.
laschar ir. Durada: 08:56 minutas.

RTR novitads 20:00

Artitgels legids il pli savens

Scrollar a sanestra Scrollar a dretga