Da las 30 patentas disponiblas per di – ha l'uniun da pestga «Lai da Segl» vendì 21 per la sonda. Blers pestgaders han damai gì gust da passentar temp sin il lai schelà e sperar sin in Namaycush – in pesch ester, che po avair ina grondezza da fin 150 cm. Quel è sa derasà ils ultims onns en il lai e duai vegnir decimà entras la pestga sin il glatsch.
En general è l’uniun cuntenta cun il svilup dals ultims onns. Ins haja pudì cuntanscher la finamira dad offirir ina purschida turistica cun la pestga sin il glatsch schelà. I vegnian savens pestgaders dad ordvart ils cunfins grischuns en l’Engiadina per far quell’experienza. Ed er il dumber dals passa 170 Namaycushs, ch’ins ha pudì pestgar durant quel temp, fetschia plaschair a l’uniun.
Ma la sonda ha l'aura fatg in stritg tras il quint dals pestgaders. Enstagl d'in patgific di sin il glatsch han els gì da far frunt ad in ferm vent – fraid e dischagreabel. Da quel vent han para era ils peschs vulì mitschar e n'han betg propi mors. Malgrà quellas cundiziuns èn ils pestgaders però restads da buna luna.
RTR Telesguard 17:40