Trais persunas èn vegnidas en ina lavina la sonda, in um da 24 onns è mort, scriva la Polizia chantunala. Ina gruppa da quatter persunas é muntada dal Pass dal Flüela en direcziun dal Piz Radönt, che sa chatta tranter Tavau e Zernez. Curt avant mezdi, cura ch’els eran sut il piz è ina lavina ida a val ed ha tschiffà dus umens ed ina dunna.
In um da 24 onns è crudà var 200 meters sur grippa a val. L’auter um e la dunna han sa blessà be lev ed han cumenzà a dar emprim agid per il disgrazià. L’equipa da la Rega ha empruvà da spendrar l’alpinist, ha dentant stuì concluder che l’um è mort al plazzal d’accident. La dunna è vegnida transportada da la Rega en l’ospital a Tavau. Il Care Team Grischun assista a la dunna ed ils dus ulteriurs umens, la polizia alpina examinescha il decurs da l’accident ensemen cun la procura publica.
