Gian Clalüna che represchenta il circul ecclesiastic «Lejs» presidiescha la raspada evangelica d’Engiadin’Ota per la perioda d’uffizi restanta fin la fin dal 2022. Il pur da Segl era enfin uss vicepresident da refurmo.ch e succeda a Gian Duri Ratti che è stà durant tschintg onns – dapi la fusiun da las otg plaivs – al timun da la raspada.
La radunanza generala da mardi saira ha ultra da quai elegì Lucian Schucan en la suprastanza sco represchentant da la regiun «Plaiv».
Rapport extern dat scleriment
Esther Maurer da la dita «avventuris» ha preschentà il rapport extern ch’ella ha scrit en incumbensa da la Plaiv evangelica d’Engiadin’Ota. En in discurs d’extrada cun mintgina da las otg persunas ch'han desditg lur plazza ils ultims quatter onns, ha la cussegliadra resumà ed analisà surtut ils motivs persunals per las desditgas. Menziunads sajan adina puspè vegnids ils medems aspects:
- Giavisch d’ina cultura da fiduzia e dapli sustegn
- Dapli respect e stima per la lavur
- Pli auta sensibilitad e responsabladad envers il project «refurmo.ch»
Esther Maurer ha resumà en ses rapport curt ch’il «nausch clima» en la Plaiv evangelica d’Engiadin’Ota saja resultà ord differents motivs:
Cun la fusiun da «refurmo» n’èn betg be vegnidas colliadas trais culturas regiunalas fitg differentas, mabain er dus munds cumplettamain divers. Quel dals reverendas cun quel da la suprastanza.
A la fin da ses rapport dat Esther Maurer anc sias recumandaziuns co ch’ins pudess evitar en l'avegnir ina situaziun tendida, sco ch’ella era en la raspada ils ultims mais. Qua menziunescha ella surtut da sa tegnair vid process da basa areguard la partiziun da resursas umanas. E da tschertgar adina puspè il dialog tranter spirituals e suprastanza.