Bun 400 persunas avevan suttascrit ed inoltrà il december 2017 l'iniziativa «Plazza Roseg». Quella ha vulì impedir la realisaziun dal project «Hotel Flaz» sin l’areal dal Sportpavillon a Puntraschigna. La vischnanca aveva decis il schaner l'iniziativa sco nunvalaivla, perquai ch'ella na correspundia betg a las leschas. Uss ha la Dretgira administrativa dà raschun a la suprastanza da Puntraschigna.
Gea, ma ...
Il cussegl communal da Puntraschigna ha entant dà ils 3 da fanadur 2018 il permiss da sbuvar l'infrastructura sin l'areal Sportpavillon e da realisar ina nova surfabricaziun sin quel. Quai è dentant collià cun pliras premissas ch'ils investiders dal project han anc da sclerir ed evader avant. Pir lura possian ins cumenzar cun il fabricat, scriva la chanzlia en la communicaziun online.
Spetgar ...
Sco che Luis Wieser, in dils investiders da las Hotel Flaz SA ha ditg ad RTR, saja il project en princip pront per cumenzar. Dentant hajan els uss da spetgar dad ina vart sin il permiss definitiv da la vischnanca e da l'autra era da guardar tge ch'ils recurrents fan en chaussa. Wieser fa quint ch'il cas vegnia tratg vinavant.
Il project prevesa in hotel da sport cun 94 stanzas ed in volumen d'investiziun da var 20 milliuns francs. Il terren ch'è en possess da la vischnanca burgaisa da Puntraschigna, vegn mess a disposiziun en dretg da construcziun.
Ils iniziants han la pussaivladad da trair vinavant il cas avant Tribunal federal. Sch'els fan quai, vegnia pir discussiunà las proximas emnas, ha confermà l’advocat dals iniziants, Andrea-Franco Stöhr. Temp hajan els tenor lescha 30 dis.
RR novitads 12:00
