Enfin il 2022 era il contact quasi interrut tranter la cumissiun da gestiun ed ils responsabels e las responsablas da la plazza aviatica. Pir suenter il rapport extern dal giurist «Wehrenberg» han ins cumenzà a collavurar meglier. Ussa è cumparì il rapport da gestiun 2024 da la cumissiun da gestiun. La collavuraziun è sa megliurada marcantamain, ma critic resta il rapport 2024 tuttina.
Noss redactur dad RTR Georg Luzzi ha analisà quest rapport:
Il rapport 2024 da la cumissiun da gestiun è vegnì preschentà – en quel vegn il cussegl administrativ da la INFRA crititgà en divers puncts?
In rapport d'in giurist extern, il rapport Wehrenberg, ha mussà sbagls cardinals en il management da la plazza aviatica a Samedan. Pir dapi il 2022 è la nova cumissiun da gestiun uss activa, ed els na spargnan betg cun critica.
Tge concret crititgescha la cumissiun da gestiun en ses rapport?
In punct ch’els han crititgà en lur rapport è il reglament d’organisaziun. Tenor la cumissiun n’è quel betg definì en detagl, per exempel dastga la INFRA consultar experts externs per tschertas lavurs u era giurists per dumondas giuridicas. En quest reglament n’èsi betg definì quant auts che quels imports dastgan esser per consultar experts e giurists. La cumissiun da gestiun tema, che quels imports pudessan explodir en l’avegnir.
Plinavant na sajan las cumpetenzas betg regladas tranter la conferenza da la plazza aviatica, il cussegl d'administraziun ed il manader da fatschenta.
In ulteriur punct: la cumissiun da gestiun pretenda gia dapi in temp in sistem da controlla per il management da project e da finanzas. La plazza aviatica a Samedan duai vegnir renovada ils proxims onns per var 70 milliuns francs. Per pudair realisar quest project dovria quai tenor la cumissiun in instrument da controlla che funcziunia, uschia ch'ins haja permanentamain la controlla da las finanzas. Quest sistem da controlla na saja anc betg avant maun.
La plazza aviatica duai vegnir modernisada per var 70 milliuns ha il rapport 2024 da la cumissun da gestiun era analisà quest project?
En il preventiv per il 2025 èsi previs d'integrar credits en l'autezza da var 2,5 milliuns francs per cumenzar cun il project da modernisaziun da la plazza aviatica. Tenor la cumissiun da gestiun èsi necessari ch'in import sumegliant stoppia vegnir approvà da las vischnancas purtadras, vul dir da las vischnancas da l'Engiadin'Ota. Per betg surpassar las cumpetenzas stoppia questa dumonda anc vegnir preschentada a las vischnancas.
Ultra da quai ston vegnir suttamess al referendum facultativ imports per lavurs che surpassan 500'000 francs. Quai vul dir, sche las lavurs vegnan surdadas ad interpresas che surpassan l'import menziunà, ston questas lavurs vegnir publitgadas ordavant en il Fegl uffizial. La cumissiun da gestiun vul uschia simplamain render attent al fatg che la lescha da submissiun sto vegnir resguardada.
Datti insumma in project concret per la nova plazza aviatica, è fin oz vegnì preschentà nagut?
Ils responsabels n'han anc betg preschentà in project concret, dentant laschà approvar ina summa da 68,5 milliuns francs a la conferenza da la plazza aviatica. Quai è era stà in punct da critica en il rapport da la cumissiun da gestiun. Senza in project concret n'hajan ins nagina basa per la planisaziun da finanzas, uschia la cumissiun da gestiun.
La collavuraziun tranter ils responsabels da la plazza aviatica e la cumissiun da gestiun para betg d'esser sa megliurada?
Sch'ins pensa ch'i na deva quasi nagina communicaziun fin l'onn 2022, lura pon ins dir oz che la collavuraziun è sa meglierada ils davos onns.
Or da l'archiv:
