Plazza aviatica Samedan - Interess moderà ma cun tenuta positiva
En tut duai la modernisaziun da la plazza aviatica Samedan custar passa 68 milliuns francs. Dasper las vischnancas da la regiun duain ils daners vegnir dal chantun, da la Confederaziun e da bancas. Las vischnancas decidan la stad che vegn.
Ils 24 da fanadur ha la Infra Samedan organisà ina saira d'infurmaziun per la populaziun nua ils possessurs da la plazza aviatica han preschentà il project e la finanziaziun dals 68 milliuns. L'interess dentant è stà moderà. Radund 80 persunas èn stadas preschentas, ina gronda part da la politica, divers possessurs d'abitaziuns secundaras ed ina pitschna part da las abitantas e dals abitants da la regiun. Vuschs criticas n'hai strusch dà ed ins ha pudì constatar ina tenuta positiva.
Legenda:
L'infurmaziun publica ha gì lieu sin la plazza aviatica a Samedan.
RTR
Ils responsabels da la INFRA, la possessura da l'infrastructura da la plazza aviatica, han preschentà ina survista, en la quala vegnan realisads ils singuls objects, vul dir il tower, ils hangars, il heliport e l'edifizi da gestiun, sco er la finanziaziun.
Il mars aveva la conferenza da la plazza aviatica approvà il concept co finanziar la modernisaziun da l'eroport Samedan ed il credit d'investiziun da 68,5 milliuns francs. Uschia è la conferenza suandada a la proposta da la cumissiun administrativa.
Danunder ch'ils daners duain vegnir
Avrir la boxSerrar la box
38 milliuns francs contribuziuns à-fonds-perdu da las 11 vischnancas da l'Engiadin'Ota.
5 milliuns francs contribuziun speziala à-fonds-perdu da la vischnanca San Murezzan. Il parlament ha deliberà il project. Il suveran decida ils 29 da zercladur a l'urna.
6 milliuns francs contribuziun à-fonds-perdu dal chantun Grischun.
6 milliuns francs emprest federal senza tschains, en connex cun la nova politica regiunala.
14 milliuns francs emprests da bancas.
Las vischnancas da l’Engiadin’Ota han pia da surpigliar en tut 38 milliuns francs, e quels vegnan scumpartids tenor ina clav da scumpart regiunala.
La valita ord vista economica e publica è uschè gronda, che quest project vegn a persvader mintga votanta e votant.
Sche la finanziun ed il credit vegnan approvads, lura segua la realisaziun en trais etappas. L'emprima è la realisaziun dal Heliport che duai vegnir construì il 2026. Quest project è gia publitgà – e vegn realisà e finanzià da la Rega ensemen cun la Heli Bernina e Swisshelicopters. La segunda etappa prevesa lura il project surmenziunà da 68,5 milliuns francs, quel duess vegnir realisà enfin il pli tard il 2031. E la terz’etappa prevesa lura anc la modernisaziun da la pista. Ils custs da radund 12 milliuns francs per quest project duessan vegnir generads tras la gestiun da la plazza aviatica.
Eroport a Samedan: Ina survista dals schabetgs
Avrir la boxSerrar la box
2017
Las 11 vischnancas da l'Engiadin'Ota (Malögia fin S-chanf) han approvà in credit d'obligaziun da 8,5 milliuns francs. Quai per la sanaziun da la plazza aviatica regiunala a Samedan. Ils custs totals per il project: 22 milliuns francs.
2019 – 2021
Elavuraziun d'in nov project tras la INFRA
2022
Preschentaziun dal project da passa 88 milliuns francs, quatter giadas dapli ch'ils custs projectads il 2017. Ina petiziun «22 e betg 88 milliuns èn approvads» vegn inoltrada. Il project è suenter sistì.
2023 – 2024
Ina nova valitaziun da la situaziun suonda cun in'expertisa giuridica. La critica va a l'adressa dals organs da planisaziun che han surpassà lur cumpetenzas. La Conferenza Plazza aviatica, sco organ il pli aut, n'ha betg agì en sia funcziun da controlla.
2024–2025
Midament en il gremi da la Infra. Mario Cavigelli, anteriur cusseglier guvernativ, daventa president da la Infra. Ils custs per il project da sanaziun da la plazza aviatica regiunala muntan a 68,5 milliuns francs per l'emprima etappa, 12 milliuns per la segunda.
Ussa
Las vischnancas da l'Engiadin'Ota duain contribuir 38 milliuns francs al project e consentir en pli ina garanzia da 20 milliuns francs. Ultra da quai ha il suveran dad abolir la decisiun dal 2017.
Tar la votaziun a l'urna ils 17 d'avust 2025 en tut las 11 vischnancas vala la maioritad absoluta da las vuschs en tut la regiun.
La votaziun a l'urna ha lieu ils 17 d'avust 2025. Causa che quai sa tracta d'ina votaziun regiunala, vala la maioritad da vuschs sur tut las vischnancas.
