Siglir tar il cuntegn

Engiadina Pliras bovas bloccheschan via da Livigno

Causa ferms urizis la mesemna saira èn sa distatgadas sur la via tranter la vischnanca da Livigno e Punt dal Gall en tut quatter bovas. Tranter quellas èn automobilists vegnids serrads en.

Ina da las quatter bovas a Livigno.
Legenda: Ina da las quatter bovas a Livigno. Vischnanca da Livigno

Tenor la polizia regiunala a Livigno èn sa distatgadas sur la via tranter la vischnanca da Livigno e Punt dal Gall en tut quatter bovas, quai la mesemna saira enturn las 18:30. Persunas n'èn betg vegnidas blessadas. Dentant èn plirs automobilists sinaquai stads serrads en tranter quellas bovas ed han stuì vegnir salvads dals pumpiers.

En il mument saja anc grev a giuditgar las dimensiuns da las devastaziuns. Perquai che las lavurs da rumida han gist pir cumenzà. Quai ch’ins po dentant gia dir è che la via resta serrada per plirs dis.

RR novitads 11:00