Siglir tar il cuntegn

Header

cuntegn

Engiadina Politica n’è betg stada pronta da far cumpromiss

La regiun Engiadina Bassa Val Müstair e las vischnancas èn vegnidas confruntads cun la dumonda da sustegnair la scola media cun almain 1,5 milliuns francs, per uschia garantir il manaschi da quest onn da scola.

Quest cumpromiss n’è la politica però betg stada pronta da far. Pertge l’onn sisur avessi duvrà ulteriurs milliuns. Ils ultims 20 onns han la regiun e las vischnancas investì passa 5 milliuns francs en l’Institut Otalpin, 4,7 da quels a fond perdu. «Quai è ussa stà tut per nagut», di il president da vischnanca da Valsot, Victor Peer.

Ils geniturs èn schoccads

Il mardi l'avantmezdi han ils geniturs dals 90 scolars da l'Institut Otalpin a Ftan survegnì la brev che l’institut serria sias portas. La saira èn els lura stads envidads ad ina infurmaziun da la scola. Las reacziuns dals geniturs suenter questa infurmaziun mussa che blers èn schoccads. «I è sgarschaivel ch’insatge uschia po capitar» ubain «igl è crudà ensemen il mund», uschia hai tunà suenter l’infurmaziun.

Sco Johannes Flury, il president dal Cussegl d’administraziun da la scola media ha ditg ad RTR, saja la discussiun stada intensiva ed emoziunala. A l’infurmaziun han be ils geniturs pudì sa participar.

Johannes Flury, il president dal Cussegl d’administraziun.
Legenda: RTR
Tut las stentas da chattar investiders e donaturs èn stadas adumbatten.
Autur: Johannes Flury president dal cussegl d'administraziun

La finala mancavan a l’Institut Otalpin mintg’onn 1,5 milliuns francs, uschia Flury. Tut las stentas da chattar investiders e donaturs sajan stadas adumbatten. Els avessan duvrà 8 fin 10 milliuns ils proxims 5 onns.

La fin da l'Institut Otalpin

Avrir la box Serrar la box

Dapi mardi èsi cler che er l’ultima acziun da salvar la scola n'ha purtà nagut. Il manaschi da la scola tradiziunala vegn serrà per immediat, quai suenter passa 200 onns.

Las raschuns: memia paucs scolars ed ina memia pitschna occupaziun da l’internat. Er il fatg che Swiss Olimpic ha retratg il label ha però gì effects negativs sin il marketing.

Bleras plazzas van a perder

Cun la serrada da l’Institut Otalpin a Ftan van era a perder radund 50 plazzas da lavur. Bun 40 da quellas sajan plazzas da magisters, ha Paul Schwendener da l’uffizi per lavur ditg ad RTR. Era sch’il martgà da lavur per magisters saja avantagius il mument, dovria quai ina tschertga flexibilitad dals magisters pertutgads, saja quai pertutgond la lavur sco era il lieu da lavur. Radund 5 persunas possia l’Institut pensiunar anticipadamain ed ils pedels possian ins intermediar en il turissem, uschia Schwendener vinavant.

Chattar ina soluziun per ils scolars

Per las scolaras ed ils scolars da l’Institut Otalpin a Ftan tschertgan ins ils proxims dis ed emnas ina schliaziun cun las autras scolas medias dal conturn. La gievgia suentermezdi van represchentants da l'Academia Engiadina da Samedan, dal Lyceum Alpinum da Zuoz e da las scolas medias da Schiers e da Tavau a Ftan per preschentar lur scolas als geniturs interessads. Uschia duessi vegnir garantì ch’ils scolars e las scolaras da l’Institut Otalpin pon cuntinuar senza interrupziun la scola l’avust.

Reacziuns d'autras scolas

La prontadad e la capacitad da prender si scolars, lezza è tar tuttas scolas media avant maun. Il pli fitg probabel tar la scola media da Schiers ch’avess plaz per enfin 40 scolaras e scolars, sco quai ch’il rectur Christian Brosi ha confermà ad RTR. Cler dettia qua era concurrenza tranter las singulas scolas medias, dentant saja quai era ina dumonda da la solidaritad envers ils pertutgads, manegia Roman Grossrieder, il manader da finanzas e servetschs dal Lyceum Alpinum a Zuoz.

Perquai ch'ils meds èn però uschè stgars na saja betg pussaivel da porscher in plan social als emploiads da l'institut. Sin quest champ collavura l'institut cun l'uffizi chantunal da lavur.

Martin Jäger en ses biro.
Legenda: RTR
La serrada da l'institut n'è nagina surpraisa.
Autur: Martin Jäger directur d'educaziun

La decisiun da serrar l’Institut Otalpin a Ftan n’è per il directur da l’Uffizi chantunal per educaziun, Martin Jäger, stada nagina surpraisa. Las cifras sajan stadas talmain nauschas che da serrar la scola saja stada l’unica soluziun. Perquai possia el star per 100% davos questa decisiun. Da perder il gimnasi saja dentant ina gronda sperdita per la regiun, ha ditg Jäger. Ella perdia tras quai attractivitad da viver. Per il chantun percunter saja quai da supportar.

Las reacziuns

Artitgels legids il pli savens