Cun montar ina segunda lingia d’auta tensiun vul la Swissgrid redublar la capacitad da la rait naziunala. En l’emprima etappa dal project vegnan ils arbers rinforzads sin il traject da 50 kilometers lunghezza tranter Zernez e La Punt Chamues-ch. Total vegnan rinforzads 127 arbers, 93 da quels hajan da vegnir remplazzads, ha ditg Robert Widmer oz a las medias.
240 camiuns a sella
Per quest lavur vegnian duvradas 5’005 tonnas atschal, quai che correspunda a 240 camiuns a sella. Las lavurs tranter Zernez e La Punt Chamues-ch duain esser a fin il fanadur da quest onn. Uschia che en in segund pass possian vegnir tratgas en las sugas d’auta tensiun. La segunda etappa da la montascha da pitgas, da Pradella fin Zernez, suonda l’onn 2022. Sco che Robert Widmer, il manader dal project ha ditg, duai il nov conduct ir en funcziun la fin dal 2022.
L’amplificaziun dal conduct fa part da la rait strategica 2025 ed è essenziala per la segirezza da provediment dal chantun Grischun e da la Svizra. Ella meglierescha il transport da l’energia da forza idraulica or da l’Engiadina.