Siglir tar il cuntegn
Inhalt

Engiadina Premi cultural da Puntraschigna per Guido Baselgia

La vischnanca da Puntraschigna ha onurà il fotograf ed artist per sias ovras cun il premi da cultura 2016. Guido Baselgia è creschì si a Puntraschigna, el lavura entant sin tut il mund.

massiv dal Bernina
Legenda: (Betg) lontan ha num l'exposiziun actuala da Guido Baselgia a Puntraschigna. mad

Guido Baselgia tutga tar ils pli impurtants artists da fotografia en Svizra ed ha gia survegnì plirs premis e distincziuns. Sias fotografias porschan perspectivas fitg insolitas. Dapi 20 onns examinescha l’um da 63 onns cuntradas da l’extrema durant retschertgas.

Engaschament total per l’ovra

Per ses purtrets va l’artist fin la fin dal mund, a la emisfera dal nord e dal sid, ma er sin ils auts en Engiadina. Durant sias lungas spassegiadas tschertga Guido Baselgia l’infinitad e la libertad da l’egliada.

(Betg) lontan

A chaschun da l’onurificaziun cun il premi cultural, preschenta Guido Baselgia sia lavur durant questa stad cun duas exposiziun a Puntraschigna. Entant ch’ins chatta en plirs lieus publics placats cun maletgs dal massiv dal Bernina, fotografà or da l’aria, survegn ins ina invista en la lavur da l’artist durant ils ultims decennis cun l’exposiziun '(betg) lontan'. Quella è da vesair questa stad en la nova galaria a Puntraschigna Plattner & Plattner.

RR actualitad 07:00