Christian Schocher è cineast. El ha manà durant 45 onns il kino Rex a Puntraschigna. Daspera ha Schocher realisà sez films - tranter auter er per Radiotelevisiun Svizra Rumantscha.
Sco capodovra da Schocher vala il film fictiv «Reisender Krieger» da l’onn 1981, realisà cun acturs laics. Per Radiotelevisiun Svizra Rumantscha ha Schocher producì tranter auter ils films «Paun jester ha 7 crustas»(1998) e «Giuventetgna dultsch utschi» (2002). Christian Schocher viva a Puntraschigna. El ha 69 onns.
Films da Schocher en kinos a Tusan, Glion e Clostra
Ils kinos culturals a Tusan, Glion e Clostra mussan ils films dal cineast da Puntraschigna a partir dals 5 da december. Per exempel «Die Kinder von Furna», l'emprim film da Christian Schocher. Cun quel ha el gì grond success avant bun 40 onns.
La surdada dal Premi cultural grischun ha lieu in venderdi, 13 da november 2015. Il premi è dotà cun 30'000 francs.
«Paun jester ha siat crustas» da Christian Schocher
«Paun jester ha siat crustas», di il proverbi sursilvan, ed uschia ha era il film num che Christian Schocher ha realisà per la Televisiun Rumantscha il 1998. Igl è l’istorgia da dunnas ed umens da la Surselva e dal Grischun central ch’èn ids la fin dals onns 60 per ils gronds hotels en Engiadina sco camarieras e chasseurs, sco mattas da chombra e portiers. L’ultima generaziun da quels stagiunaris era gia il 1998 magari veglia, uschia ch’è stà bun che Christian Schocher ha laschà raquintar els e lur patruns da quel chapitel pauc enconuschent da l’istorgia da l’economia grischuna.
