La Selfie Box da l'interpresa Producta Marketing da la Val Müstair ha survegnì il premi d'innovaziun 2015 da la regiun Engiadina Bassa / Val Müstair. Quai pervi ch'i sa tractia dad ina idea simpla cun in grond effect. I saja fitg positiv ch'ina interpresa possia stgaffir plazzas da lavur en regiuns periferas cun in product sco la Selfie Box. Quai ha ditg Emil Müller da la regiun Engiadina Bassa / Val Müstair tar la surdada dal premi d'innovaziun venderdi saira a Müstair.
La Selfie Box è ina chascha cun in grond buttun. Sch'ins stat davant la box e smatga il buttun, lura datti in selfie che vegn chargià immediatamain sin las plattafurmas da las medias socialas. Interpresas sco Audi e BMW èn clients che dovran la Selfie Box tar occurrenzas pli grondas.
La Selfie Box vegn producida per 80% en Val Müstair, ha ditg Adrian Gamper da la Producta Marketing. Quai saja impurtant per restar innovativ. Ils partenaris involvids sajan tuts interessads da sviluppar vinavant la Selfie Box. Proximamain vul la Producta Marketing engaschar 2 persunas che lavuran vinavant per il product Selfie Box.