La 51avla ediziun dal turnier da sigl da chavals a Zuoz, il Concours Hippique, vegn stritgà. L’occurrenza n’è betg realisabla uschia sco fin qua, cun tut las pretaisas dadas dal Chantun, uschia la presidenta da l’organisaziun, Ladina Tarnuzzer. Surtut il dumber limità da 300 persunas surpassas l’eveniment a Zuoz gia be cun ils participants e lur gidanters – senza quintar tiers ils voluntaris ed ils aspectaturs durant ils quatter dis. L’onn passà ha il turnier quintà 1’200 partenzas durant quatter dis.
Il Concours Hippique Zuoz senza aspectaturs sin tribuna va betg. L’eveniment viva surtut da sia atmosfera famigliara.
Auter ha decis Ladina Meyer-Ratti, la dunna a la testa dal turnier a San Murezzan. Ella è persvasa ch’els rivan da tegnair en las prescripziuns actualas en connex cun l’eveniment.
Nus avain ina fitg gronda plazza, nua che nus rivain er da spartir si fitg bain la glieud durant l’emna da Concours Hippique a San Murezzan.
Main attractiv saja l’occurrenza però er ord il punct da vista dals sponsurs, uschia Ladina Tarnuzzer. Senza pudair avair il public sin la tribuna durant ils sigls, e senza ina premiaziun avant aspectaturs, sa sbassass er la valur per ils donaturs da premis sin la plazza. Ultra da quai purtass ella sco persuna privata tut la responsabladad en il cas ch’i capitass insatge. Quai na vul la presidenta dal comité d’organisaziun betg ristgar.
Sperar sin limitaziun pli auta
Cun decider da trair tras il turnier da sigl a San Murezzan, haja il comité d’organisaziun dentant gia fatg quint, che la limitaziun dad oz 300 persunas vegnia anc augmentada fin l’avust, uschia la presidenta Ladina Meyer. Dentant porschia la plazza da Polo a San Murezzan en mintga cas avunda spazi per tegnair en las reglas.
Porscher alternativas
Cunquai che blers participants dal turnier da sigl a Zuoz avevan gia reservà in alloschi avant ch’il Concours Hippiqe è vegnì ditg giu, vulan ils organisaturs offrir ina pussaivladad da tuttina vegnir en Engiadina per passentar dis da vacanzas durant las emprimas emnas da l’avust. Ultra da quai, haja il turnier da San Murezzan entant gia pudì notar annunzias da chavaltgaders che fissan partids a Zuoz.
-
Bild 1 von 3. Ladina Meyer-Ratti, la presidenta dal Concours Hippique San Murezzan è persvasa ch'els rivan da tegnair en las prescripziuns che valan causa il coronavirus.... Bildquelle: RTR, Anna Caprez.
-
Bild 2 von 3. ....Ladina Tarnuzzer, la presidenta dal Concours Hippique Zuoz percunter, ha stuì dir giu l'occurenza pervia las pretaisas dal Chantun. Bildquelle: RTR, Anna Caprez.
-
Bild 3 von 3. Il Concours Hippique a San Murezzan ha lieu la fin da fanadur. Bildquelle: RTR, Anna Caprez.