Sco la vischnanca da Zernez publitgescha sin sia pagina d’internet datti entant trais candidaturas per il presidi communal da Zernez. Suenter che Fadri Guler e Marco Lazzarini eran gia s’inscrit per la successiun dad Emil Müller, è entant er enconuschent che l’anteriur president communal da Zernez Domenic Toutsch vul puspè turnar al timun da la vischnanca. El era president communal da Zernez fin dal 2010.
Populaziun ha la schelta
Cun las trais candidaturas ch'èn enconuschentas enfin ussa, ha il suveran da Zernez gia ina schelta per las tschernas dals 15 da matg 2022. Ulteriuras candidaturas per la perioda d’uffizi 2023–2026 èn anc pussiblas.
Il president communal da Zernez actual Emil Müller è vegnì elegì sco president communal dad Egnach en il chantun Turgovia. El resta en uffizi enfin la fin da matg. Suenter è previs ch’il vicepresident Riet Denoth surpiglia las mastrinas enfin la fin da l’onn. Quella persuna che vegn elegida il matg, surpiglia l’uffizi il 1. da schaner 2023.