La vischnanca da Puntraschigna ha dubis sche intginas abitaziuns – inditgadas sco emprimas abitaziuns vegnan er propi nizzegiadas sco talas. Tenor Nora Saratz Cazin, la presidenta communala da Puntraschigna dettia quai numnadamain differents indizis per quels dubis. Perquai ha la vischnanca scrit a 14 proprietarias e proprietaris d’abitaziuns ina brev cun la supplica da mussar si co ch’els dovran lur abitaziun.
Dapli vita en vischnanca
Il motiv principal per quest agir saja che las abitaziuns per indigens a Puntraschigna sajan stgarsas ed uschia manchia pia er la vita en las abitaziuns ed en la vischnanca. Las 14 persunas che la vischnanca ha contactà han uss da cumprovar che lur center da la vita è a Puntraschigna. Sche quai na saja betg il cas, hajan ellas las pussaivladads dad ubain midar il center da la vita en Engiadina, da vender u da dar a fit l’abitaziun ad indigens, uschia Nora Saratz Cazin. Sin questa moda vul la vischnanca da Puntraschigna puspè dar vita en las emprimas abitaziuns ed a la vischnanca sco tala.