Privels versus turissem – nua èn ils cunfins

Dad ina vart èn qua privels da la natira, da l’autra vart è ina val sco la Bregaglia dependenta era dal turissem. A San Murezzan ha gì lieu ina saira d’infurmaziun davart quest spagat, la natira sco valur per il turissem ed il medem mument era in privel per quel.

Laschar ir video «Viver cun ils privels da la natira – ina sfida per las regiuns turisticas»

Viver cun ils privels da la natira – ina sfida per las regiuns...

3:33 min, Telesguard dals 31.10.2017

Bondo quest’onn e Galtür en il Tirol il 1999, omadus vitgs èn stads pertutgads d’ina catastrofa da la natira. Persunas èn mortas ed infrastructura è vegnida devastada. Prioritad han en l'emprim temp suenter la catastrofa la segirezza e la reconstrucziun. Ma era il tema turissem na dastga betg vegnir negligida a lunga vista.

La situaziun turistica a Galtür

A Galtür è la solidaritad stada gronda era da la vart dals giasts. Bain n'ha in u l’auter turist betg pli visità Galtür, ma las cifras dal lieu turistic èn restadas relativamain constantas era suenter la gronda catastrofa dal 1999. Il favrer da quest onn avev'ina lavina sepulì parts da Galtür, 31 persunas eran mortas.

Il facit da la saira

A la fin da la sairada d'infurmaziun eran tut ils preschents dal medem avis. Suenter ina catastrofa è ina communicaziun averta e transparenta il pli impurtant, saja quai envers la populaziun indigena ma era envers ils giasts.

Ina finamira duess esser, da far cler che las las vals pertutgadas d’ina catastrofa n’existan betg mo da lieus privlus. En questas regiuns datti purschidas attractivas e lieus ch’èn degns da vegnir visitads era en l'avegnir.

RR actualitad 12:00