La regenza chantunala è sa cunvegnida cun in'ulteriura interpresa da construcziun davart il pajament da var in milliun francs. En total muntan ils pajaments da cumparegliaziun al chantun ed a las vischnancas entras las interpresas da construcziun a radund 9 milliuns francs.
Cunvegnientscha cun l'Implenia Svizra SA
La regenza e l'Implenia èn sa cunvegnids sin in pajament da cumpensaziun da radund in milliun francs. La cumpensaziun è vegnida fixada sin basa dal rapport da la WEKO sco er sin basa da controlla dals cudeschs da l'interpresa. Cun fixar il pajament ha la regenza tenor communicaziun er vulì dar in signal che la collavuraziun dad in'interpresa possia vegnir resguardà.
KIBAG Bauleistungen SA vegn exclusa
Il chantun n'è betg vegnì da chattar ina cunvegna cun la KIBAG. Ord quest motiv ha la regenza decis da sclauder l'interpresa per plirs onns d'incumbensas publicas dal chantuns. La decisiun n'ha anc nagina vigur legala. La regenza saja vinavant pronta da chattar ina schliaziun cun l'interpresa da construcziun. L'interpresa sezza n'è betg pronta d'acceptar la decisiun ed ha gia annunzià da far recurs.
Analisa è terminada
Entras la cunvegna cun l'Implenia ha la regenza terminà l'analisa da las investigaziuns da la WEKO. Gia la stad 2019 era il chantun sa cunvegnì cun nov interpresas da construcziun sin ina summa da cumpensaziun da radund 6 milliuns francs. La primavaira 2020 è la regenza alura sa cunvegnida cun ulteriuras tschintg interpresas. Tut las interpresas han ultra dals pajaments stuì s'obligar d'introducir in program da compliance.
