Ils davos dis è creschida la svieuta tar ils tancadis en Samignun per 50 fin 60% conferma Jon Andri Zegg, il gestiunari d'in tancadi en Samignun. Sper la bell'aura saja segir era l'augment dal pretsch dal carburant in motiv.
Pretschs auts da carburant promovan turissem da tancar
Samignun, sco zona da dazi liber, era gia avant la guerra en l'Ucraina che ha chaschunà la crisa da carburant, in lieu da turissem da tancar. Ussa che ils pretschs èn creschids en Svizra sin sur dus francs per liter, van anc daplirs fin en Samignun a tancar. La differenza da pretschs è restada sin radund 30 fin 40 raps per liter.
Il president communal da Samignun, Karl Jenal, tema che sche il pretsch dal carburant crescha anc dapli patescha la mobilitad uschè fitg che il turissem da carburant croda ensemen. Quant aut che il pretsch possia crescher per che quai capita na sa era el betg ed el spera che quella limita na vegn mai cuntanschida.
