Dapi la fin dal 2018 è enconuschent ch’iniziants privats vulan introducir sgols directs ord citads europeanas a Samedan. Grazia a tals sgols duain giasts bainstants pudair vegnir sin via directa en Engiadina ed uschia generar dapli pernottaziuns. L’hotel da 5 stailas Badrutt’s Palace a San Murezzan vul uss realisar quest’idea cun organisar sco test il favrer emprims sgols da charter da Londra a Samedan.
Nus vulain porscher a noss giasts ina via pli simpla tar nus.
L’impuls ha dà il project da pilot en occasiun dal 100avel anniversari da l’emprim sgol tranter l’Engiadina e Londra. In bigliet da return duai custar 1’600 francs. Il permiss da l’Uffizi federal d’aviatica civila BAZL è anc pendent.
Optimala fasa da test
Ils sgols da test ch’il hotel da tschintg stailas ha previs per il favrer sajan ina buna pussaivladad per ramassar experientscha, ha declerà il cussegliader da gestiun Peder Plaz al SRF Regiunaljournal Grischun. El aveva fatg l’emprima analisa a reguard la realisabladad da sgols da charter a Samedan.
Sfida per Samedan
Era sch’il project da pilot actual n’è betg grond, porta el per la plazza aviatica en Engiadina er difficultads. Mintga persuna ha numnadamain d'arrivar a moda segira vi tar l’aviun. E las valischs ed ils passagiers han er da vegnir controllads, uschia il pledader da la plazza aviatica Christian Gorfer. Tenor el vuli uss adattaziuns tar l’infrastructura. Ultra da quai dovri tenor il BAZL ina scolaziun dal persunal.
18-12-2018: Il Telesguard ha rapportà
RTR actualitad 12:00