Siglir tar il cuntegn
cuntegn

Engiadina Projects d’engrondiment regiun da skis Samignun in pass enavant

Ils plans da las pendicularas da Samignun, consistan da plirs projects. En tut muntan las investiziuns giavischadas a radund 90 milliuns francs. Sco proxim ha la populaziun da Samignun da decider en chaussa.

regiun cun naiv
Legenda: La vart svizra da la regiun da skis da la Silvretta Arena duai vegnir engrondida. Pendicularas Samignun

Il territori da skis a Samignun duai vegnir schlargià en direcziun da «Ravaischer Salaas». Las premissas èn uss dadas cun l’approvaziun da la planisaziun locala tras la regenza grischuna. Sper l’engrondiment dal territori da la Silvretta Arena da la vart da Samignun, duai er l’access en la regiun da skis vegnir megliurà.

Access direct

Finamira saja, uschia il directur da las pendicularas, Marco Jenal, d’investir en dus novs implants en la regiun da «Ravaischer Salaas» ed ina pendiculara che maina da Samignun direct sin la muntogna.

Ultra da quai è previs da realisar in’ulteriura pendiculara davent da la fracziun Compatsch vers la regiun Alp Trida. Uschia avess mintga fracziun da Samignun ina pendiculara vers il territori da skis, ina uschenumnada purschida da «ski-in/ski-out».

Populaziun decida

Sco il directur da las pendicularas Samignun, Mario Jenal ha ditg ad RTR, vegnia tut il pachet cun ils singuls projects d’investiziun, avant la populaziun. El fa quint cun la fin da november / entschatta december.

Tut ils plans sajan dentant be realisabels cun il sustegn dals dus acziunaris principals da las pendicularas: la vischnanca da Samignun e la part austriaca Ischgl, ch'è colliada cun l’arena da skis svizra.

regiun da skis cun staziun
Legenda: Las pendicularas Samignun vulan che mintga fracziun haja in agen implant d'access en la regiun da skis. Pendicularas Samignun

Radunanza generala

Sper prender cogniziun davart ils projects da las pendicularas Samignun per ils proxims onns, han ils acziunaris er approvà il rendaquint 2017/18 da l'interpresa. Quel serra cun in cashflow da bun 8,72 milliuns francs.

RR novitads 17:00