Cun il project «Promo Femina» vul il post d’egualitad da schanzas per dunnas ed umens dal chantun Grischun preschentar schanzas e sfidas per dunnas en la politica. La finamira è dad animar las dunnas da s’engaschar en l’executiva communala. Il project preschenta las sfidas ma era las schanzas per dunnas.
Ensemen cun la scola auta spezialisada dal Grischun (FHGR) ha il post lantschà il project menziunà e preschentà quel en differentas regiuns. Tranter auter era a Scuol. Da la partida èn era las presidentas da las vischnancas da Scuol e Val Müstair.
Differents temas en vegnids discutads, il sustegn da la famiglia, l’interess per la politica a chasa, il ristg da surpigliar ina carica, la tema da far sbagls, la scolaziun ed era las pussaivladads ch'umens, en posiziuns politicas, han per sustegnair dapli las dunnas da far politica.
Il facit da l’occurrenza, nua che radund 30 dunnas e singuls umens èn sa participads, ha fatg il manader projects e substitut dal manader dal uffizi per vischnancas dal chantun Grischun, Simon Theus. El è persvas ch'i dat en radund 10 onns dapli dunnas en la politica. Actualmain èn mo 14 da las 101 vischnancas grischunas timunadas da dunnas.
Tenor Theus èn radund 80% dals absolvents d'ina furmaziun professiunala superiura dunnas – e questa tendenza mussa che dunnas vegnan segir a s’engaschar dapli en gremis politics.