Siglir tar il cuntegn

Header

cuntegn

Proteger dal luf Protecziun permanenta è indispensabla

Era en Engiadina Bassa preves'ins ch'il luf vegn a restar permanent. Ils purs da nursas ston preveder mesiras rigurusas per proteger la scossa.

Sin il territori da la fracziun da Ramosch datti duas regiuns nua che las nursas pasculeschan normalmain, ina a Chöglias ed ina a Russenna, ina regiun che sa chattia sin il cunfin cun l’Italia. A partir da quest’onn vegn però la regiun Chöglias stritgada, quai or da motivs da segirezza. Quella regiun n’è betg adattada per proteger cun chauns e cun saivs las nursas, uschia il chau d’alp Arthur Schweizer da Ramosch, pur da radund 150 nursas.

audio
Ils purs en Engiadina bassa vulan proteger lur scossas dal luf
ord Actualitad dals 21.04.2023. Maletg: MAD
laschar ir. Durada: 2 minutas 53 Secundas.

Tut las 600 nursas sin Russenna

Ils purs da nursas tramettan tut las nursas sin Russenna. Cun saivs e cun quatter chauns da protecziun preves'ins da segirar las nursas. Plinavant vegn la scossa protegida da bun’ura fin saira dad ina nursera. La saira vegn la scossa serrada en in seragl.

Avantatgs e dischavantatgs

Cun questas mesiras rigurusas han ins gia lavurà l’onn passà e quai cun success tenor il chau d’alp. Ma cun questas mesiras datti era dischavantatgs, las nursas maglian pli gugent vers saira cura che las temperaturas èn pli miaivlas e gist là èn ellas serradas en in serragl. Plinavant ston las nursas viver bler pli datiers ina da tschella e quai procura per malsognas, uschia Arthur Schweizer.

Pli gugent las mesiras sco perder nursas

Ma per il pur da nursas passiunà èsi cler. Actualmain bastan quellas mesiras. En avegnir vegnan ins a vesair quants lufs che sa chattian da chasa en Engiadina Bassa e lura na bastan eventualmain las mesiras dad ozendi betg pli.

RTR actualitad 08:00;

Artitgels legids il pli savens