Quatter da las 11 vischnancas purtadras da l’Engiadin’Ota han refusà il project d’integrar l’Ospital regiunal a Samedan en l’Ospital chantunal a Cuira. Uschia è quest project giud maisa, perquai che tut las 11 vischnancas da l'Engiadin'Ota avessan stuì dir gea. Ils responsabels da l'Ospital chantunal avevan gia la fin da l'avrigl mess giud maisa il project.
Però co vinavant? La situaziun finanziala da l'Ospital na mida betg, uschia che la Fundaziun provediment da sanadad Engiadin'Ota (SGO) ha d'elavurar ulteriuras strategias pussaivlas. Cun il status quo stuessan las vischnancas da la regiun Malögia surpigliar custs da radund 9 milliuns francs – mintg'onn. Quai tenor las calculaziuns da la SGO tar la preschentaziun da las variantas il november passà.
Per dapli squitsch procura il fatg che la cunvegna da prestaziun actuala scada la fin da quest onn. Perquai ha il cussegl da fundaziun incumbensà ina gruppa da lavur che duai definir ils proxims pass, ha communitgà la Fundaziun Provediment da sanadad Engiadin’Ota. Quai suenter che la lunga istorgia da l'eventuala fusiun cun l'Ospital chantunal dal Grischun è in chapitel serrà.
