La presidenta dal cussegl d'administraziun Gabriela Payer ed il cusseglier da fundaziun e d'administraziun Marco Kleger han communitgà il mardi passà, da demissiunar dals organs da la Fundaziun provediment sanadad Engiadin’Ota (SGO).
Sco ch’il cussegl da fundaziun scriva en ina communicaziun, deplorescha el fitg questas decisiuns. La direcziun dal cussegl administrativ vegn surpigliada a partir d'immediat da Gian Melcher, il vicepresident dal cussegl administrativ.
En vista a las discordias a l'ospital da l'Engiadin'Ota, ch'èn vegnidas purtadas fin en la publicitad, conferma il cussegl da fundaziun, ch'il cussegl administrativ e la direcziun da la SGO giaudian la plaina fidanza dal cussegl da fundaziun. Il cussegl da fundaziun stettia davos las decisiuns dal cussegl d'administraziun e da la direcziun prendidas ils ultims mais.
Mediatur extern duai sclerir
Per sclerir la situaziun actuala a l'ospital da l'Engiadin'Ota vegn il cussegl da fundaziun ad organisar bainprest ina sesida da mediaziun cun tut las partidas involvidas. Quai sajan la represchentanza dals collavuraturs, la direcziun, il cussegl administrativ ed il cussegl da fundaziun, sco la fundaziun scriva.
Las sesidas duain vegnir accumpagnadas d'in mediatur extern. Ultra da quai s'expriman tut ils organs directivs da la SGO per endrizzar in post da mediaziun independent. Sco ch'il president dal cussegl da fundaziun Christian Brantschen vegn cità en la communicaziun, vegnian ils giavischs dals collavuraturs da la SGO prendids fitg serius per uschia cuntanscher barat avert.
Midada abrupta il zercladur
Il zercladur era la schefmedia da la ginecologia Ladina Christoffel vegnida dispensada. Quai suenter ch’ella aveva demissiunà sia plazza il matg per la fin da november 2023. La relaschada saja succedida suenter differenzas davart il manaschi operativ, quai aveva scrit Ladina Christoffel en ina brev averta en gasetta.
Sche las demissiuns èn da metter en connex cun las differenzas dals mais passads, n'è betg enconuschent. Ni Gabriela Payer, ni Marco Kleger èn stads cuntanschibels per prender posiziun envers RTR.