L’onn 1873 è vegnida fundada l’organisaziun da pumpiers a San Murezzan. Quest onn festivescha ella il 150avel giubileum ed è cun quai ina da las pli veglias organisaziuns da pumpiers voluntaria da la Svizra.
Svilup d’incumbensas principalas
En tut quels onns, n'è be sa sviluppada la lavur dals pumpiers, mabain er ils vehichels, l'iseglia ed en general er las circumstanzas, di Raphael Bauer, uffizier dals pumpiers San Murezzan/Schlarigna. Sajan quai stabiliments, il turissem u il trafic – tut saja vegnì pli grond e pli modern. Er la lavur centrala, il stizzar fieus, saja oz be pli ina pitschna part dals cas. Cas da salvament sin via u cas da defensiun d’ieli u chemia u auters cas elementars capitian pli savens.
Il cumbat d’incendis è oz be pli ina pitschna part da nossa lavur.
Difficil d’attrair novs pumpiers
Avant 10 onns èn las organisaziuns da pumpiers communalas da San Murezzan e Schlarigna sa messas ensemen. Oz è l’organisaziun fusiunada ina basa chantunala e quinta 90 pumpiers e pumpieras. Da motivar ed animar nova glieud per ils pumpiers saja ina gronda sfida, uschè Raphael Bauer. Adina puspè organiseschan els spiertas da pumpiers per uffants u er curs da scolaziuns.