Siglir tar il cuntegn

Header

video
Salvament sin lais e duair da las vischnancas
Or da Telesguard dals 21.02.2019.
laschar ir. Durada: 2 minutas 57 Secundas.
cuntegn

Engiadina Pumpiers vulan ina soluziun chantunala

Il rapport chantunal da salvament d’aua pretenda che las vischnancas duessan surdar il salvament sin ils lais als pumpiers. Ils pumpiers avessan però pli gugent ina soluziun chantunala e na communala.

Tenor il rapport da la gruppa da lavur chantunala en connex cun il salvament d’aua duess restar il salvament sin ils lais vinavant causa da las vischnancas. Quellas dessan surdar quella lavur als pumpiers. Ils pumpiers da San Murezzan e dals Trais Lejs, numnadamain da Silvaplauna e da Segl, fan quai gia oz.

La gruppa da lavur chantunala crititgescha en ses rapport precis quest punct. Che questa situaziun actuala na saja betg acceptabla. Ina cuntradicziun, u meglier ditg, in dilemma.

audio
Saira: Salvamant d'aua - consequenzas rapport per vischnancas
ord Actualitad dals 21.02.2019.
laschar ir. Durada: 2 minutas 35 Secundas.

Per soluziun chantunala

Las vischnancas sco era il pumpiers da l’Engiadin'Ota avessa giavischà ina soluziun chantunala, quai tenor Christian Meuli, il president communal da Segl sco era il cumandant dals pumpiers da San Murezzan, Fredi Zarucchi.

Il problem saja tranter auter ina lescha chantunala che prescriva che las vischnancas da riva èn responsablas per il servetsch da salvament sin lais e betg il chantun.

Proxim proceder

Sco proxim pass prov’ins da chattar ina soluziun regiunala en Engiadin’Ota, però la speranza sin ina soluziun chantunala na vul ins betg anc sepulir manegia Christian Meuli.

La regenza n'ha anc betg decidì sch’ella vul realisar il salvament sco cusseglià en il rapport u na.

RR actualitad 17:00/TSG 17:40

Artitgels legids il pli savens