Sut squitsch – en furma da sablunar – vegn la colur veglia allontanada. Quai natiralmain en in pachetadi serrà ermeticamain. La colur na dastga betg vegnir en il flum e far donn als animals. Sper la sanaziun da la construcziun vegnan era refatgs ils pilasters ed il fund da lain.
115 onns veglia
Dal 1905 era questa punt vegnida fabritgada sco attracziun turistica per dar als giasts la pussaivladad da traversar l’En. Dapi il 1980 na dastga pli nagin trafic motorisà passar quella. Be peduns e bikers, tranter auter passa sur quella punt era il «Bike-Maraton dal Parc Naziunal».
Investir en la segirezza
Questa punt ha ina lunghezza da 145 meters e 70 meters autezza. Singulas persunas han nizzegià quella punt per far suicidi. Il vitg da Scuol prevesa perquai d’investir era en la segirezza. La saiv vegn pli auta e betg pli a l'ur da la punt – uschia ins vul preservar da decider da raiver suravi. Plinavant vegnan era montadas tavlas d’infurmaziun cun si il numer dal clom d’agid.
Las lavurs da revisiun cumplessivas duran anc enfin in november 2020. Il vitg da Scuol investescha radund 2,2 milliuns francs en las lavurs da la punt da Gurlaina che stat sut protecziun da monuments Grischuna.