La plaiv catolica San Spiert a Puntraschigna po guardar enavos sin in'istorgia turbulenta durant ils ultims 100 onns. Quai cun totalmain trais etappas da construcziun. Il cumenzament dals onns 1920 saja creschì il desideri dals abitants catolics da Puntraschigna ed er da numerus giasts d’avair in’atgna baselgia. Fin là metteva a disposiziun la vischnanca politica da Puntraschigna la sala communala (oz la «Sela culturela») u ina stanza da scola per las messas.
Baselgia or d'in casino
Dal 1923 ha la cuminanza catolica da Puntraschigna cumprà per 115’000 francs l’edifizi da l’anteriur restaurant Tais, ch’aveva er in casino sut quel tetg. Entant ch’il restaurant era anc restà en funcziun, è vegnì transmidà or da la sala ina baselgia. Tut las infurmaziuns per scriver ina cronica, haja’l chattà en documents vegls, ha declerà il president da la plaiv, Battesta Albin.
Ils daners per cumprar l’edifizi ha la plaiv catolica er savì ramassar grazia a donaziuns da numerus giasts en Engiadina.
Successivamain è la baselgia vegnida engrondida ils onns suandants. Dapi il 1973 n’è il bajetg sco tal betg pli vegnì midà grond. Dapi quest onn èn montads panels solars sin il tetg da la baselgia. Caracterisada vegn ella dad ina vart tras sias otg fanestras da l’artist Enrico Leoni Donati da Turitg. Da l’autra è l’orgla da baselgia marcanta. Tranter auter er causa ch’ella è posiziunada davant en il chor e betg sco usità en la part davos da la baselgia Son Spiert.
Dapli commembers grazia a cuminanza portugaisa
Entant ch’il dumber da commembers da la plaiv catolica San Spiert a Puntraschigna era avant in tschientaner enturn 200, quinta la baselgia oz radund 1’000 cartentas e cartents. Ina gronda part da quels sajan persunas oriundamain dal Portugal, uschè Battesta Albin. Dapi il 2002 enritgescha er il «cor portugues» adina puspè las messas en la baselgia
Ina festa per tuts
En occasiun dal giubileum da 100 onns, envida la plaiv catolica San Spiert Puntraschigna a mintgina e mintgin da visitar la sonda, 19 d’avust 2023 a las 10:30 il cult divin festiv cun l’uvestg Joseph Maria Bonnemain. Ultra da quai accumpognan gardists svizzers las festivitads da giubileum il venderdi saira cun raquintar dapli davart lur lavur en la guardia papala a Roma.