Passa 40 onns ha il fotograf da Puntraschigna, Alfred Lochau manà ensemen cun sia dunna Margrit l’affar da fotografias Foto Flury a Puntraschigna en la terza generaziun. Fundà quest affar aveva il guid da muntogna e fotograf Alexander Flury l’onn 1863. Enconuschent per sias fotografias da purtrets dad alpinists, era el er in dals emprims en l'Engiadina che aveva realisà l’impurtanza da fotografias da la cuntrada.
Il svilup fotografic fascinescha
Sias cameras dals onns 1870 aveva Alfred Lochau chattà sin palantschin cura che sia famiglia aveva renovà la chasa. Las cameras veglias ed il svilup tecnic fascineschan anc oz Alfred Lochau. En sia carriera ha el ramassà passa 500 cameras da fotografar, dad anticas enfin las pli modernas e lascha uschia reviver l’istorgia da 160 onns fotografar. Suenter ch’el e sia dunna han serrà l’affar da fotografias a Puntraschigna ed èn ids en pensiun, ha ses fundus chattà in nov dachasa en il Museum Alpin.
In’istorgia che tutga a Puntraschigna
Per il president dal Museum Alpin, Hansjörg Pfäffli è l’integraziun dal stgazi dad Alfred Lochau ina ritgezza per il museum ed il lieu sco tal. Numnadamain saja l’alpinissem la cumpetenza centrala dal museum. Da rudlar si l’istorgia dal fotografar en quest'exposiziun permanenta e pudair preschentar chaussas betg enconuschentas al public, fetschia grond plaschair.
Or da l'archiv: Era l'alpinist Arno Mainetti è fotograf passiunà.
